___Karakia

E te Atua Matua
kō koe te kaihanga o te rangi me te whenua
te mātāpuna o te ora, o te tapu.
Ko tō mātou inoi tēnei hōutia tō rongo ki runga i te whenua,
ki waenganui i te tangata.
Tirohia atawhaitia te kaupapa tātari i ngā take pā ki Te Tiriti o Waitangi.
Arohaina tonutia ngā tīkanga kawe i te kaupapa kia puta mārama ai te
rangatiratanga o te tangata, o te whenua.
Werohia mātou ki te tao o te pono kia tūtuki, rawatia ēnei take.
E te Atua, kia aroha nui nei ki a mātou.
Kō koe hoki te tīmatanga me to whakatūtukitanga o ngā mea katoa.

Mihi

Ki te mano me te tini o ngā tūpuna i paiheretia te mauri o Te Rarawa,
ngā mihi whānui atu ki a rātou, kua wehe atu ki tua o te ārai
ki roto i te wharara o te rangi, ki pūōrangi, ka tau ki hororangi,
koia e heke nei te tāngata ki te pō, e rere nei te wairua ki te rangi.
Papa te whatitiri uira kapakapa ki runga o ngā maunga hirahira o Te Rarawa,
hikihiki rangi ko Tāne, ko wai tērā ki te whakapūaki ki ngā kete o aronui, tuāuri, tuātea.
Mā wai rā e whakakapi ngā kōhao whakaputa, mā te Kuīni pea?
Ka nui te rarunga o Te Rarawa i roto i ngā tau o te ture muru whenua,
a i rawakoretia ngā uri whakaheke.
Nā wai rā ēnei mahi whakareianga, ko kitea ehara ko te Kuīni.
E ngā hapū o Te Rarawa maranga ki runga, manaakitia tō iwi,
herea te tāngata ki te whenua toenga.
Ngā maramara i tōhētia i te Whare Mīere,
ō rātou i para te huarahi i te roanga.
Ngā pitihana māringi, ngā hīkoitanga tautōhē,
ngā ngāio ki ngā kooti teitei aue ina te kohuretanga.
Ko te whakapapatanga kia whiwhi i te korōria o te aiotanga,
i roto i ngā pono me te tika o ngā tatūranga kerēme hauora ki te tāngata.